Hyderabad: జంతు ప్రేమికులకు శుభవార్త.. వాటికోసం ప్రత్యేకంగా నగరంలో సేవలు

ప్రస్తుత కాలంలో ఇంట్లో పెంపుడు జంతువులను పెంచుకోవడం సర్వసాధారణమైపోయింది. వీటిలో కుక్కలు, పిల్లులు, పక్షులు ఇలా వేటికవే ప్రత్యేకం. ఇంట్లో కుటుంబసభ్యుల్లా కలిసిపోయి.. ఒత్తిడి తగ్గిస్తూ, ఆనందాన్నిచ్చే ఇవంటే ఎనలేని అభిమానం. అయితే వీటి వల్ల మరో సమస్య ఉంటుంది. అందేంటంటే.. మనం ఎప్పుడైనా ఎక్కడికైనా వెళ్లాల్సి వచ్చినప్పుడు పెట్స్ ను వెంట తీసుకెళ్లడం ఇబ్బందికరంగా ఉంటుంది. వాటితో రైళ్లలో, విమానాల్లో ప్రయాణించడం చాలా కష్టం. ఇక సుదీర్ఘ ప్రయాణాలు ఉన్న సమయంలో వాటిని ఇంట్లో వదిలిపెట్టి వెళ్లలేం. పోనీ.. పక్కింటివారికో, తెలిసిన వారికో చెప్పి వెళ్దాం అనుకుంటే వారు సరిగా చూసుకుంటారో లేదో అనే భయం. ఈ ఇబ్బందులు తీర్చేందుకు హైదరాబాద్ నగరంలో వినూత్న సర్వీసులు అందుబాటులోకి వచ్చాయి. పెట్‌ రీలొకేషన్‌ సర్వీసెస్ పేరిట సేవలు అందిస్తున్నాయి. హైటెక్‌సిటీ, జూబ్లీహిల్స్‌ తదితర ప్రాంతాల్లో ఈ సంస్థలు పని చేస్తున్నాయి. నిర్ణీత ఛార్జీలు వసూలు చేస్తూ పెట్స్ ను కావాల్సిన చోటుకు పంపిస్తున్నాయి.

అయితే రైలు, ఎయిర్ సర్వీసుల్లో పెట్స్ ను తీసుకువెళ్లేందుకు ప్రభుత్వం నుంచి చాలా అనుమతులు తీసుకోవాల్సి ఉంటుంది. ఇవన్నీ ఎవరు చేస్తారులే అనుకునే వారు పెట్ రీలొకేషన్ సర్వీసులను ఆశ్రయిస్తున్నారు. అయితే జంతు ప్రేమికుల నుంచి ఈ సంస్థలకు మంచి స్పందనే వస్తోంది.

మరిన్ని తెలంగాణ న్యూస్ కోసం ఇక్కడ క్లిక్ చేయండి